Fevralın 2-də, Ağ Şəhərdə yerləşən Bazar Meydanında Azərbaycan Gəncləri Günü münasibətilə “GenZ FEST” adlı festival keçirilib.
Uvertura.az xəbər verir ki, Azərbaycan Gənclər Fondunun dəstəyi ilə Azərbaycan Tələbə Gənclər Təşkilatları İttifaqı (ATGTİ) tərəfindən təşkil olunan festivalda 5 mindən çox tələbə iştirak edib.
1997-ci ildə Ulu Öndər Heydər Əliyev tərəfindən əsası qoyulan 2 Fevral – Gənclər Günü ilə bağlı keçirilən tədbirin məqsədi, ali və orta ixtisas təhsil müəssisələrinin tələbələrini bu xüsusi gündə bir araya gətirərək, Azərbaycan gəncliyinə göstərilən diqqət və qayğını bir daha vurğulamaqdır. Eyni zamanda, imtahan sessiyalarından sonra tələbələrə stressdən uzaq bir mühit təmin etmək və dövlətlə gənclər arasında əlaqələri daha da gücləndirməkdir.
Tədbirdə çıxış edən ATGTİ sədri Rəşad Zeynalov, Gənclər Fondunun icraçı direktoru Qədir Xəlilov və Elm və Təhsil Nazirinin müşaviri Nicat Məmmədli 1997-ci ildə Azərbaycanda Gənclər Günü təsis edildikdə, bu günün digər MDB və Şərqi Avropa ölkələrində qeyd edilmədiyini diqqətə çatdırıblar. Natiqlər, Ümummilli Lider Heydər Əliyevin gənclərə daim xüsusi diqqət ayırdığını və bu siyasətin Prezident İlham Əliyev tərəfindən uğurla davam etdirildiyini qeyd edərək, gənclər üçün yaradılan imkanları vurğulayıblar.
Çıxışçılar, qalib Azərbaycan gənclərini öz üzərlərində çalışaraq ölkənin inkişafına töhfə verməyə, gənclərə dair layihələrdə aktiv iştirak etməyə və dövlət proqramlarından fəal şəkildə istifadə etməyə çağırıblar.
Tədbir boyunca müxtəlif musiqi və rəqs nümayişləri, viktorinalar və yarışlar təşkil olunub.
