Azərbaycanın Özbəkistandakı səfirliyinin nəzdində fəaliyyət göstərən Heydər Əliyev adına Mədəniyyət Mərkəzinin təşəbbüsü ilə Muqimi adına Özbəkistan Dövlət Akademik Musiqili Teatrında Beynəlxalq Teatr Günü münasibətilə “Dostluq səhnələri” adlı tədbir keçirilib. Bu tədbir, Azərbaycan milli teatrına həsr olunmuş ilk tədbir kimi tarixə düşüb.
Uvertura.az xəbər verir ki, Muqimi adına Özbəkistan Dövlət Akademik Musiqili Teatrının direktor müavini Xayrulla İnağamov çıxış edərək qonaqları salamlayıb və Özbəkistan teatrlarının vaxtaşırı klassik Azərbaycan musiqili komediyalarına müraciət etdiyini qeyd edib. O, Azərbaycan müəlliflərinin əsərləri əsasında hazırlanmış tamaşaların həmişə böyük maraqla qarşılandığını vurğulayıb. X.İnağamov, Azərbaycan Dövlət Musiqili Komediya Teatrı ilə geniş əlaqələrinin olduğunu bildirərək, iki il əvvəl Bakıda Məcid Şamxalovun “Qaynana” komediyası ilə qastrol səfərində olduqlarını və tamaşanın böyük uğurla keçdiyini xatırladıb.
Heydər Əliyev adına Azərbaycan Mədəniyyət Mərkəzinin direktoru Akif Marifli çıxışında qeyd edib ki, martın 10-u Azərbaycanda Milli Teatr Günü kimi qeyd olunur. O, Azərbaycan teatrının 1873-cü ildə yaranaraq 152 illik inkişaf yolunu keçdiyini vurğulayıb. Marifli, Azərbaycan teatrının Şərqdə, o cümlədən Özbəkistanda teatrın yaranmasına mühüm təsir göstərdiyini qeyd edib.
A.Marifli bildirib ki, Mədəniyyət Mərkəzi Özbəkistanda Azərbaycan teatrının təbliği istiqamətində bir sıra layihələr həyata keçirir. Mərkəzdə gənclərdən ibarət teatr truppası yaradılıb və truppa üzvləri Azərbaycan müəlliflərinin pyeslərini səhnələşdirir. Bununla yanaşı, klassik və müasir Azərbaycan pyeslərinin özbək dilinə tərcümə olunması istiqamətində də işlər görülür.
Tədbirdə çıxış edən Akif Marifli, Muqimi adına Özbəkistan Dövlət Akademik Musiqili Teatrı ilə əməkdaşlığın teatr əlaqələrinin genişlənməsinə və Azərbaycan-Özbəkistan mədəni əlaqələrinin inkişafına mühüm töhfə verəcəyini bildirib.
Konsert proqramında Muqimi teatrının aktyorları Üzeyir Hacıbəylinin “Arşın mal alan”, Məcid Şamxalovun “Qaynana” əsərlərindən səhnələr təqdim ediblər. Azərbaycan Mədəniyyət Mərkəzinin Teatr Truppası isə “O olmasın bu olsun” musiqili komediyasından səhnələr göstərib. Mədəniyyət Mərkəzinin “Azərbaycan” rəqs ansamblı da bu tamaşalarda rəqs və musiqi nömrələri ilə çıxış edib. Tədbir rəqs və aktyorların birgə ifasında “Biz mehriban ailəyik” mahnısı ilə sona çatıb.
