Azərbaycanın Özbəkistandakı səfirliyinin nəzdində fəaliyyət göstərən Heydər Əliyev adına Mədəniyyət Mərkəzinin təşəbbüsü ilə Xalq artisti Zabit Nəbizadə, Əməkdar artistlər Sahib Paşazadə və Xəyyam Məmmədov Özbəkistan Dövlət İncəsənət və Mədəniyyət İnstitutunun tələbələri üçün mühazirələr oxumuş və ustad dərsləri keçirmişlər.
Uvertura.az Azərtac-a istinadən xəbər verir ki, Bu ustad dərsləri Heydər Əliyev adına Mədəniyyət Mərkəzinin təşəbbüsü və təşkilatçılığı, Beynəlxalq Muğam Mərkəzinin dəstəyi ilə həyata keçirilmişdir.
Tədbirlər Özbəkistan Dövlət İncəsənət və Mədəniyyət İnstitutu və Yunus Rəcəbi adına Özbəkistan Milli Musiqi Sənəti İnstitutu ilə əldə olunan razılaşma əsasında təşkil olunub. Bu layihə, Azərbaycanın mədəniyyəti, incəsənəti, ədəbiyyatı və tarixinə dair mövzuların Özbəkistan ali təhsil müəssisələrinin tədris proqramlarına daxil edilməsi məqsədi daşıyır.
Mühazirələrdən əvvəl azərbaycanlı sənətkarlar institutun fakültələrində tədris prosesləri ilə tanış olub, müəllim kollektivi ilə görüşərək fikir mübadiləsi aparıblar.
Zabit Nəbizadə və Xəyyam Məmmədov Azərbaycan milli muğam sənətinin və özbək milli makom sənətinin mənəvi zənginlik, təhsil və tərbiyə baxımından əhəmiyyətindən bəhs ediblər. Onlar Azərbaycan muğamları, xalq mahnıları və təsnifləri barədə geniş məlumat verərək, ifa üslubu, muğamda qəzəl seçimi və xüsusiyyətlərini auditoriyaya izah ediblər. Ustad dərsləri zamanı muğamlarımızın canlı ifası təqdim edilib, dəstgah anlayışı və şöbələrin ardıcıllığı dinləyicilərə peşəkar şəkildə çatdırılıb.
Sahib Paşazadə isə yeddi əsas Azərbaycan muğamının xarakterik xüsusiyyətləri, ifa tərzləri və digər ölkələrin muğamlarından fərqli cəhətləri haqqında ətraflı məlumat verib. O, tar ifaçılığında Azərbaycan bəstəkarlarının əsərlərinin interpretasiyası, alətin texniki və bədii imkanları barədə danışaraq, bir neçə əsəri canlı olaraq ifa edib. İfa sonrası isə əsərlərin interpretasiya xüsusiyyətləri və dinləyiciyə çatdırılması mövzusunda izahlar verib.
Bir neçə gün davam edən ustad dərslərinə Özbəkistan Mədəniyyət Nazirliyinin nümayəndələri, müəllimlər, tələbələr və media təmsilçiləri də qatılıblar.
