Fevralın 26-da Azərbaycan Bəstəkarlar İttifaqında Xocalı faciəsinin 33-cü ildönümünə həsr olunmuş anım mərasimi təşkil edilib.
Uvertura.az Azərtac-a istinadən xəbər verir ki, Tədbirdə çıxış edən İttifaqın sədri, AMEA-nın müxbir üzvü, Xalq artisti, professor Firəngiz Əlizadə Xocalı faciəsinin xalqımızın tarixində buraxdığı dərin izlərdən söz açıb. O, bu hadisənin təsiri ilə yaranmış musiqi əsərlərinə toxunaraq bildirib: “Bəstəkarlar müxtəlif janrlarda Xocalıya həsr olunmuş əsərlər ərsəyə gətiriblər. Bunlara Azər Dadaşovun “Xocalıya ədalət” simfonik plakatu, Faiq Nağıyevin “Xocalı harayı” rekviyemi, Elnarə Dadaşovanın orqan üçün yazdığı “Xocalı laylası”, Tural Məmmədlinin kamança və piano üçün bəstələdiyi “Xocalıya ithaf”, Azad Zahidin “Rekviyem”, Nazim Quliyevin “Xocalı” operası, Aleksandr Çaykovskinin “Xocalı” və Balnur Kıdırbeyin simfonik orkestr üçün “Xocalı qurbanları” əsərləri misal göstərilə bilər.”
Əməkdar incəsənət xadimi, professor Gülnaz Abdullazadə, AMEA-nın müxbir üzvü, elmlər doktoru, professor Rəna Məmmədova, Əməkdar incəsənət xadimi, sənətşünaslıq elmlər doktoru, professor Kamilə Dadaşzadə, Əməkdar incəsənət xadimi, professor Həcər Babayeva və digər çıxışçılar faciənin musiqidə əks olunmasının əhəmiyyətindən danışaraq, bu əsərlərin təbliğinin vacibliyini qeyd ediblər.
Tədbirin bədii hissəsində görkəmli bəstəkar Məmməd Quliyevin 1995-ci ildə yazdığı “Xocalı” rekviyemi səsləndirilib.
