Aprelin 9-da Azərbaycan Musiqi Mədəniyyəti Dövlət Muzeyində avstraliyalı musiqiçi, kontrabas ifaçısı, bəstəkar və pedaqoq Con Varneylə “Daxili dənizləri sərhəd olan ölkələrdən musiqi” adlı musiqili görüş baş tutacaq.
Uvertura.az Azərtac-a istinadən xəbər verir ki, bu tədbir Mədəniyyət Nazirliyi və Azərbaycan Musiqi Mədəniyyəti Dövlət Muzeyinin dəstəyi ilə reallaşacaq. Görüş zamanı ifaçı Con Varney həm yaradıcılığı, həm də ümumi musiqi barədə çıxış edəcək və dinləyicilərə unikal musiqi nömrələri təqdim edəcək.
Avstraliyalı kontrabas ifaçısına Azərbaycan Milli Konservatoriyasının əməkdaşı, beynəlxalq müsabiqələr laureatı və pianoçu Nərmin İsgəndərova yoldaşlıq edəcək. Tədbirdə peşəkar musiqiçilərin ifasında həm dünya, həm də Azərbaycan bəstəkarlarının klassik əsərlərindən parçalar səsləndiriləcək.
Con Varney ömrünün böyük hissəsini kontrabas ifaçılığına həsr edib. O, musiqi təhsilini Melburn və Sidneydə almış, daha sonra peşəkar orkestrlərdə çıxış etməyə başlamışdır. Bu təhsil prosesi onu dünyanın ən nüfuzlu kontrabas ifaçılarından və pedaqoqlarından biri hesab olunan Franko Petrakçi ilə bir araya gətirmişdir. Peşəkar ifaçılıqla yanaşı, Con Varney həm öz vətənində, həm də Cənubi Amerika və Kolumbiyada pedaqoji fəaliyyətlə məşğul olmuşdur.
