Uvertura.az xəbər verir ki, bu gün, 11 noyabr 2024, Azərbaycan musiqi dünyasının böyük simalarından biri olan, Xalq artisti İslam Rzayevin anadan olmasının 90 illiyi tamamlanır. İslam Rzayev, Azərbaycan xalqının musiqi irsində dərin iz qoymuş, çoxsaylı mahnılar, muğamlar və instrumental əsərlərlə yaddaşlarda qalacaq bir sənətkar olub.
İslam Rzayev 1934-cü il noyabrın 11-də Füzuli rayonunun Sərdarlı kəndində dünyaya göz açıb. O, ilk təhsilini başa vurduqdan sonra Bakıda Asəf Zeynallı adına Musiqi Texnikumuna daxil olub. İslam Rzayev burada ustad sənətkar Seyid Şuşinskinin sinfində xanəndəlik sənətinin sirlərinə dərindən yiyələnib. Bu dövrdə onun bir müğənni kimi yetişməsində görkəmli ifaçılardan Zülfi Adıgözəlovun və Həqiqət Rzayevanın böyük təsiri olub. İslam Rzayev daha sonralar Azərbaycan Dövlət Mədəniyyət və İncəsənət Universitetini bitirib. İfaçılıq sənətinə gənc yaşlarından başlayan müğənni uzun illər ərzində Müslüm Maqomayev adına Azərbaycan Dövlət Akademik Filarmoniyasının solisti olub. “Muğam Teatrı”nın yaradıcılarından biri olan İslam Rzayev 1988-ci ildən ömrünün sonunadək burada bədii rəhbər kimi fəaliyyət göstərib.
Azərbaycan musiqi sənəti sahəsindəki nailiyyətlərinə görə İslam Rzayev bir sıra mükafatlara layiq görülüb. O, müstəqil Azərbaycan Respublikasının ali mükafatı olan “Şöhrət” ordeni ilə təltif edilib.
Xanəndə 2008-ci il yanvarın 26-da Bakı şəhərində vəfat edib.
Bu gün, həm sənətkarın həyatına, həm də onun yaratdığı musiqi mirasına bir dəfə daha dərin hörmətlə yanaşırıq.Onun adı Azərbaycan musiqisinin tarixinə əbədi həkk olunub və gələcəkdə də yad ediləcəkdir.
