Mədəniyyət Nazirliyi, Bəstəkarlar İttifaqı və Gəncə Filarmoniyasının birgə təşkilatçılığı ilə Gəncə Dövlət Filarmoniyasının yubileyinə həsr olunmuş Fikrət Əmirov adına I Ümumrespublika Musiqi Festivalı martın 9-dək davam edəcək.
Uvertura.az Azərtac-a istinadən xəbər verir ki, martın 4-də Azərbaycan Bəstəkarlar İttifaqının Ü.Hacıbəyli adına konsert salonunda festivalın açılış mərasiminə həsr olunmuş “Azərbaycan musiqi mədəniyyətinin inkişafında Fikrət Əmirovun rolu” mövzusunda elmi seminar keçirilib.
Seminarı giriş sözü ilə açan Azərbaycan Bəstəkarlar İttifaqının sədri, Xalq artisti, AMEA-nın müxbir üzvü, professor Firəngiz Əlizadə, Fikrət Əmirovun milli və dünya musiqi mədəniyyətinə töhfələrini vurğulayıb. O, həmçinin bəstəkarın yaradıcılığını araşdıran monoqrafiyalar və elmi məqalələr barədə geniş məlumat verib.
Festivalın bədii rəhbəri, Əməkdar artist, Gəncə Filarmoniyasının direktoru Ramil Qasımov çıxış edərək festival çərçivəsində baş tutacaq konsertlər və tədbirlər haqqında ətraflı danışıb.
Daha sonra tanınmış ssenarist və rejissor, Əməkdar incəsənət xadimi Cahangir Zeynallının “Fikrət Əmirov” sənədli filmi nümayiş etdirilib.
Sənətşünaslıq üzrə fəlsəfə doktoru, Əməkdar mədəniyyət işçisi Səadət Təhmirazqızının moderatorluğu ilə davam edən tədbirdə bəstəkarın yaradıcılığının müxtəlif istiqamətləri üzrə “Fikrət Əmirovun simfonik muğamları”, “Fikrət Əmirov yaradıcılığında milli ideologiyanın təcəssümü”, “Fikrət Əmirovun “Sevil” operası”, “Fikrət Əmirovun yaradıcılığında Şərq mövzuları” və “Fikrət Əmirovun vokal yaradıcılığında milli ənənələrin təzahürü” mövzularında məruzələr dinlənilib.
Seminarın bədii hissəsində bəstəkarın nadir əsərlərindən olan “İki sahil” romansının həm video formatda, həm də canlı ifada təqdimatı, eləcə də “Sevil” operasından Balaşın ariyasının səsləndirilməsi ilə tədbir yekunlaşıb.
