Aprelin 1-dən etibarən Heydər Əliyev Mərkəzində növbəti məşhur əsər nümayiş olunur. Bu gün italiyalı heykəltəraş Lorenzo Quinnin “Qəlbim sənindir” adlı əsərinin təqdimatı baş tutub. Nəfis Bohem büllurundan və 6500 illik palıd ağacından hazırlanmış bu əsər ilk dəfə Heydər Əliyev Mərkəzində sərgilənir.
Uvertura.az Azərtac-a istinadən xəbər verir ki, təqdimat mərasimində çıxış edən Heydər Əliyev Mərkəzinin direktoru Anar Ələkbərov, Mərkəzdə çoxsaylı sərgilərin keçirildiyini və İtaliya incəsənətinə tez-tez müraciət olunduğunu bildirib.
Anar Ələkbərov ötən ilin sonunda COP29 çərçivəsində Lorenzo Quinnin “Təbiətdə tarazlıq” sərgisinin də Heydər Əliyev Mərkəzində nümayiş etdirildiyini və qonaqların bu sərgiyə böyük maraq göstərdiyini vurğulayıb. O, müəllifə, sərginin kuratoruna və təşkilatda əməyi olan hər kəsə təşəkkür edib.
“365 Art” şirkətinin təsisçisi və sərginin kuratoru Olqa Daniele çıxışında “Qəlbim sənindir” əsərinin formalaşma prosesinin uzun və zəhmətli olduğunu qeyd edib. O bildirib ki, büllurun xüsusi işlənməsi mütləqdir, çünki bu materialın formaya salınması xüsusi üsul tələb edir. Əsərdə istifadə olunan qədim palıd materialının isə 6500 illik tarixi var.
Sərginin müəllifi Lorenzo Quinn “Qəlbim sənindir” əsərinin ilk dəfə məhz Heydər Əliyev Mərkəzində təqdim olunmasından qürur duyduğunu ifadə edib. O qeyd edib ki, əsərlər insanların qəlblərini və ölkələri bir araya gətirmək məqsədi daşıyır. “Mən eşqə və sevgi gücünə inanıram. İnsanlar birləşdikcə, aralarındakı bağ sarsılmaz olur. Qədim palıddan hazırlanan bu əsər də uzunömürlü münasibətləri simvolizə edir” – deyə o vurğulayıb.
Əsər nadir bir incəsənət kompozisiyası kimi zərifliyi və kövrəkliyi özündə cəmləşdirir. Müəllif, əsərin ifadəsini gücləndirmək üçün əks materiallardan istifadə edib: güc və möhkəmliyi simvolizə edən palıddan hazırlanmış ürəyi, zərifliyi ifadə edən Bohem kristalından hazırlanmış incə əllər əhatələyir. Lorenzo Quinnin insan əllərinin ifadəli təsvirləri ilə məşhur olduğu halda, bu dəfə büllurdan istifadə etməsi onun yaradıcılığında bir ilkdir.
Hazırda Heydər Əliyev Mərkəzində Lorenzo Quinnin “Təbiətdə tarazlıq” fərdi sərgisi davam edir. “Qəlbim sənindir” kompozisiyası da bu sərginin bir hissəsi kimi insanlıq və təbiət arasındakı əlaqəni vurğulayan mesajı çatdırır.
