İstanbulda Azərbaycan mədəniyyətini tanıtmaq və Qarabağ Zəfərini daha geniş auditoriyaya təqdim etmək məqsədilə “Qarabağdan İstanbula” mövzusunda xalça sərgisi və panel müzakirəsi təşkil olunub.
Uvertura.az Azərtac-a istinadən xəbər verir ki, Türkiyə Gənclik və Təhsilə Xidmət Vəqfi (TÜRGEV) ilə “Xarıbülbül” Azərbaycan Vizyon Teatr Birliyinin əməkdaşlığı ilə reallaşan tədbir İstanbulun Gözəl İşlər Fabrikası (GİF) “Safveti Paşa” mərkəzində baş tutub.
Tədbirin açılışında çıxış edən TÜRGEV-in İdarə Heyətinin sədri Hatice Akıncı Yılmaz, Qarabağın Türk dünyasının tarixində xüsusi yer tutduğunu, uzun illər boyu davam edən mübarizələrin və vətən sevgisinin simvolu olduğunu qeyd edib.
O, bildirib: “Qarabağ yalnız bir torpaq parçası deyil, eyni zamanda, bir millətin iradəsinin, səbrinin və birliyinin simvoludur. Xocalıda yaşanan faciə və illərlə sürən işğal hamımızı dərin şəkildə sarsıtdı. Lakin bu, eyni zamanda, Türk dünyasında Azərbaycanın haqlı mübarizəsini dəstəkləmək üçün daha sıx bir əlaqə qurulmasına səbəb oldu. Qarabağdakı zülm və Azərbaycanın haqlı davasını dünyaya çatdırmaq üçün Türkiyə ardıcıl şəkildə böyük səylər göstərdi. Prezident Rəcəb Tayyib Ərdoğanın rəhbərliyi altında dövlət qurumlarımız və vətəndaş cəmiyyəti “Bir millət, iki dövlət” şüarı ilə hər zaman Azərbaycanın yanında durdu. Şükürlər olsun ki, haqq öz yerini tapdı və Qarabağ torpaqları 30 illik işğaldan azad edildi. Bu gün burada Azərbaycanın tarixi və mədəni zənginliyini, Türk dünyasının dərin əlaqələrini sənət vasitəsilə bir daha yad etmək üçün toplandıq. Sənət, millətlərin ruhunu canlandıran, tarixini yaşadan və keçmişdən gələcəyə işıq tutan bir körpüdür. Bu körpü sayəsində millətlər öz kimliklərini formalaşdırır və dünyaya öz mədəniyyətlərini təqdim edirlər.”
Tədbir çərçivəsində “Qarabağın tarixi, toxuma sənətindən bu günə qədər olan səyahət” mövzusunda panel iclası təşkil edilib.
Paneldə, Rəssamlar İttifaqının üzvü və Azərbaycanın xalq yaradıcılığı üzrə mütəxəssisi Elnarə Rəsulova sərgidəki xalçaların xüsusiyyətləri və hər birinin hekayəsi haqqında danışıb. Milli parça kolleksiyaçısı və araşdırmaçı Fuad Cəbrayılov isə “Azərbaycanın ənənəvi Qarabağ qadın geyimləri və tarixi formaları” mövzusunda təqdimat edib. “Xarıbülbül” Azərbaycan Vizyon Teatr Birliyinin qurucusu, aktrisa Kəmələ Kamal Cabbarova isə Qarabağın xalçaları, mədəni irsi, bölgənin sənəti və tarixi barədə məlumat verib.
Proqram çərçivəsində iştirakçılara həm Azərbaycan, həm də Türk mətbəxinin müxtəlif bölgələrinə aid ləziz nümunələr təqdim edilib.
Tədbirdə Elnarə Rəsulovanın ideya müəllifi olduğu əsərlər, o cümlədən dünyanın məşhur muzeylərində sərgilənən, Azərbaycanın 7 bölgəsinə aid qədim xalçaların replikaları və Qarabağ Zəfərinə həsr olunmuş xalçalar yer alıb. Bu əsərlər arasında “Ata vəsiyyəti, oğul Zəfəri”, “Dəmir Yumruq”, “Laçın zirvəsi”, Azərbaycan-Türkiyə qardaşlığına həsr olunmuş “Bir millət, iki dövlət… tək yumruq” və “Soyumuz bir, dinimiz bir” kimi nümunələr də sərgilənib.
