Şəki, festivallar şəhəri olaraq, bu dəfə də beynəlxalq bir tədbirə ev sahibliyi edir.
Uvertura.az Azərtac-a istinadən xəbər verir ki, dekabrın 1-də Şəki Dövlət Dram Teatrında IV Şəki Beynəlxalq Teatr Festivalının açılışı baş tutub.
Festival, Mədəniyyət Nazirliyi, Şəki Şəhər İcra Hakimiyyəti və Azərbaycan Teatr Xadimləri İttifaqının birgə təşkilatçılığı ilə keçirilib və milli peşəkar teatrın Şəkidə yaranmasının 145 illik yubileyinə həsr olunub.
Dekabrın 5-dək davam edəcək bu festivalda, ölkəmizin teatr kollektivləri ilə yanaşı, Qazaxıstan, Özbəkistan və İrandan da tanınmış teatr qrupları iştirak edirlər. Azərbaycanı bu festivalda Azərbaycan Dövlət Akademik Musiqili Teatrı, Gəncə Dövlət Milli Dram Teatrı və Şəki Dövlət Dram Teatrı təmsil edir.
Festivalın açılış mərasimində təşkilatçılar, tanınmış incəsənət xadimləri, teatrsevərlər və yerli sakinlər iştirak ediblər.
Açılışdan əvvəl, iştirakçılar Ümummilli Lider Heydər Əliyevin abidəsi önünə gül dəstələri qoyaraq, onun xatirəsini ehtiramla yad ediblər.
Açılış mərasimində Azərbaycanın Dövlət Himni səsləndirilib və Şəki teatrının fəaliyyətindən bəhs edən bir film nümayiş etdirilib.
Açılış mərasimindən sonra, Şəki Dövlət Dram Teatrı, Vilyam Şekspirin “Heç nədən hay-küy” adlı romantik komediyasını tamaşaçılara təqdim edib. Tamaşanın quruluşçu rejissoru Əməkdar incəsənət xadimi Mirbala Səlimli, quruluşçu rəssamı Sahib Əhmədov, geyim üzrə rəssamı isə Dilşad Şirinovadır. Tamaşada rolları Əməkdar artistlər Xanlar Həşimzadə, Əbülfət Salahov, Rəhim Qocayev və digər tanınmış aktyorlar ifa ediblər.
Tamaşa, Orta əsrlərdə İtaliyada baş verən romantik hadisələrdən bəhs edir və əsas mövzu dostluq, xəyanət, sevgi və xeyrin şər üzərindəki qələbəsidir.
