M.Maqomayev adına Azərbaycan Dövlət Akademik Filarmoniyasının Kamera və Orqan Musiqisi Zalında “Əngəlsiz musiqi” adlı konsert təşkil edilib.
Uvertura.az xəbər verir ki, tədbirdə ilk olaraq piano müəllimi, Ərzurum Atatürk Universitetinin sosiologiya ixtisası üzrə tələbəsi Lalə Cəfərova autizmli uşaqlar üçün musiqi təhsilinin əhəmiyyətindən bəhs edib. O, musiqinin universal dili ilə cəmiyyətin bütün təbəqələrini birləşdirmək gücünə malik olduğunu vurğulayıb.
Daha sonra müxtəlif ifaçıların iştirakı ilə konsert proqramı təqdim olunub. Səhnədə Koral Erdeniz, Elias Ələkbərov, Zərifə Cəfərova, Can Hilton (piano), Cəlalə İsmayılzadə (cello), Nilay Quluzadə (xanəndə), Fərhad Nuraylı, Ziya Hümmət, Əkbər Hüseynov (tar), Fərhad Əliyev, Nazənin Məmmədli (kamança), Şahanə Əhmədsoy və Röya Namazova (qanun) öz bacarıqlarını nümayiş etdiriblər.
Bakı Şəhər Mədəniyyət Baş İdarəsinin tabeliyində fəaliyyət göstərən Niyazi adına 22 nömrəli Uşaq Musiqi Məktəbinin II sinif şagirdi, pianoçu Ayxan Quluzadə (müəllim: Dilarə Əhmədova) da konsertdə uğurla çıxış edib.
Konsertdə Azərbaycan və Avropa bəstəkarlarının əsərləri səsləndirilib.
Qeyd edək ki, bu kimi tədbirlərin keçirilməsi autizm sindromlu uşaqların istedadlarının üzə çıxarılmasına və cəmiyyətin onların ehtiyaclarına daha fərdi yanaşmasına töhfə verir.
