Dekabrın 27-də Azərbaycan Dövlət Kukla Teatrının səhnəsində balacalar üçün “Şaxta Baba haradadır?” adlı tamaşa nümayiş etdiriləcək.
Uvertura.az Azərtac-a istinadən xəbər verir ki, bu səhnə işi hər gün 4 seansla (12:00, 14:00, 16:00 və 18:00) 5 yanvar 2025-ci il tarixinədək nümayiş olunacaq.
Birhissəli uşaq tamaşasının (Azərbaycan dilində) səhnələşdirəni və quruluşçu rejissoru Səidə Haqverdiyeva, quruluşçu rəssamı isə İqbal Əliyevdir.
Tamaşada personajları (kukla və canlı planla) teatrın aktyorları Aygül Ağayeva, Səriyyə Mansurova, Cavid Telman, Elnur Xəlilov, Araz Həsənli, Elxan İsmayılov, Könül Nəsibova, Vüqar İsmayılov və Səbinə Məmmədova canlandıracaqlar.
Musiqi tərtibatlı tamaşanın əsas məqsədi uşaqları nağıllar aləminə aparmaq və onları bu sehrli dünyayla tanış etməkdir.
Tamaşada baş verən hadisələr əyləncəli məzmunla olsa da, əsas ideya balaca tamaşaçılara xeyirxahlıq, dürüstlük, özünə inam və ətrafa sevgi aşılayaraq, onları bəd əməllərdən, pislikdən və paxıllıqdan uzaq saxlamaqdır.
Bir saatlıq səhnə işində milli və dünya klassik nağıl qəhrəmanları, hamıya tanış personajlar bir araya gələrək, şənliyə gedərkən yolunu itirir və sıx meşənin dərinliklərində azan Şaxta babanı axtarırlar. Arada tamaşaçılar da bu işə cəlb ediləcək.
Macəra dolu tamaşada hadisələr komik və həyəcanlı anlarla davam edəcək. Şər qüvvə hesab olunan personajlar nə qədər mane olmağa çalışsalar da, sevilən qəhrəmanlar onların planlarını pozaraq Şaxta babanı şənliyə çatdıracaqlar.
