Küveyt Universitetinin təşkilatçılığı ilə Küveyt Dövlətinin Milli Gününə və həmin ilin Ərəb Dünyasının Mədəniyyət və Media paytaxtı olaraq seçilməsinə həsr olunan mədəni tədbir keçirilib.
Uvertura.az Azərtac-a istinadən xəbər verir ki, tədbirdə müxtəlif sahələri təmsil edən yerli qurumlarla yanaşı, ölkədə akkreditə olunmuş diplomatik nümayəndəliklərin üzvləri də iştirak ediblər.
Azərbaycan Respublikasının Küveyt Dövlətindəki səfirliyi və burada fəaliyyət göstərən “Vətənsevər” Azərbaycan-Küveyt Dostluq Cəmiyyəti tərəfindən birgə təşkil edilən Azərbaycan guşəsi açılıb.
Tədbir çərçivəsində ölkələrin tarixi, adət-ənənələri, milli geyimləri, xalçaları, musiqisi, mədəni irsi, turizm potensialı və milli mətbəxi ilə bağlı geniş sərgi təşkil olunub və müxtəlif mədəni proqramlar təqdim edilib.
Tədbir iştirakçılarına Azərbaycanın tarixi, mədəniyyəti, mətbəxi, milli geyimləri, xalçaçılıq sənəti, turizm potensialı haqqında ətraflı məlumat verilib, həmçinin, çap materialları təqdim edilib.
Bundan əlavə, tədbir zamanı Küveyt Universitetində təhsil alan əcnəbi tələbələrin öz ölkələrinin bayraqları ilə nümayişi təşkil edilib.
Tədbirdə Küveyt Universitetində təhsil alan Azərbaycanlı tələbələr milli geyimlərdə xalq rəqslərini nümayiş etdirib və onların çıxışı ziyarətçilər tərəfindən böyük maraqla qarşılanıb.
Sərgi ziyarətçilərinə Azərbaycan mətbəxinə aid yeməklər və şirniyyatlar təqdim edilib.
Sərgi, universitetin müəllim və tələbə heyəti ilə yanaşı, Küveyt ictimaiyyətinin müxtəlif nümayəndələri tərəfindən də ziyarət edilib.
