Laçın şəhərində yenidən bərpa edilən “Lacinema” kino mərkəzində 33 illik fasilədən sonra ilk film nümayişi olacaq.
Uvertura.az xəbər verir ki, tarixi faktlara əsaslanan “Azərbaycan Atabəyləri” adlı bədii-sənədli filmin nümayişi fevralın 7-də saat 18:00-də keçiriləcək.
Filmin nümayişinin əsas məqsədi “Böyük Qayıdış” proqramı çərçivəsində doğma torpaqlarına geri qayıdan laçınlılar və ətraf bölgələrdən olan soydaşlarımızın asudə vaxtlarını səmərəli keçirmələrinə dəstək olmaqdır.
Film, orta əsrlərdə yaşamış türk dünyasının iki böyük tarixi şəxsiyyəti, cəsur sərkərdələr olan Qara Sungur və Atabəylər dövlətinin qurucusu Şəmsəddin Eldənizin hekayəsini təqdim edir. Ekran əsəri izləyiciləri XII əsrin möhtəşəm mühitinə apararaq, Azərbaycanın zəngin və şanlı tarixini işıqlandırır və həmin dövrün milli-mənəvi irsimizi təbliğ edir.
