Uvertura.az Azərtac-a istinadən xəbər verir ki, 27 noyabr tarixində Beynəlxalq Muğam Mərkəzində görkəmli alim Məmməd Arif Dadaşzadənin anadan olmasının 120 illiyi qeyd edilib.
Tədbirdə, alimin nəvəsi, Üzeyir Hacıbəyli adına Bakı Musiqi Akademiyasının professoru, Əməkdar incəsənət xadimi Zümrüd Dadaşzadə, akademik Məmməd Arif Dadaşzadənin gənclərə olan diqqət və qayğısından danışmışdır. O, babasının həm görkəmli bəstəkar Qara Qarayevlə, həm də ümumilikdə onun kimi şəxsiyyətlərlə müqayisə edilə biləcəyini qeyd edərək, alimin elmi fəaliyyətinin ailənin mənəvi dünyasına təsirini vurğulamışdır.
Tədbirin ssenari müəllifi, Əməkdar jurnalist Qafar Əsgərzadə, akademik Dadaşzadənin həyatını və yaradıcılığını iştirakçılara təqdim etmişdir. Alimin “Müxtəsər Azərbaycan ədəbiyyatı tarixi”, “Azərbaycan ədəbiyyatı tarixi” və “Azərbaycan sovet ədəbiyyatı tarixi” kimi tədqiqatlarının əhəmiyyətindən danışılmışdır.
Əməkdar incəsənət xadimi Gülarə Əliyeva adına “Dan ulduzu” instrumental ansamblı gecəni müşayiət etmişdir. Ansamblın bədii rəhbəri isə Əməkdar artist Tariyel Abbasov olmuşdur. Tədbirin sonunda alimin nəvələri Zümrüd və Aqşin Dadaşzadələr, babalarına göstərilən hörmət və diqqətə görə təşəkkürlərini bildirmişlər.
