8 Mart – Beynəlxalq Qadınlar Günü ərəfəsində Azərbaycan incəsənətində mühüm yer tutan qadın sənətkarlarımızın əsərləri Milli İncəsənət Muzeyinin kolleksiyasında təqdim olunur.
Uvertura.az xəbər verir ki, bu sənətkarlardan biri də istedadlı rəssam Qeysər Kaşıyevadır.
Qeyd edək ki, Şərq qadınları mürəkkəb dövrlərdə parlaq istedadları ilə seçiliblər. Müasir düşüncəli və cəsarətli şəxsiyyət kimi tanınan Qeysər xanım musiqiyə də maraq göstərib. 1907–1908-ci illərdə Tiflisdə İncəsənəti Təşviq Cəmiyyətinin nəzdində fəaliyyət göstərən rəssamlıq məktəbində təhsil alan Q.Kaşıyeva peşəkar təhsil almış ilk azərbaycanlı qadın rəssamdır. O, XX əsrin əvvəllərində milli təsviri sənətimizdə realizm ənənələrinin formalaşmasına töhfə verən sənətkarlardandır.
Dövrümüzə onun az sayda əsərləri gəlib çatsa da, Q.Kaşıyevanın qrafik işlərinin bir qismi Azərbaycan Milli İncəsənət Muzeyində qorunur. Hazırda “1920-1980-ci illər Azərbaycan rəngkarlığı və qrafikası” adlı ekspozisiyada rəssamın iki portreti nümayiş etdirilir
