Xalq artisti Miri Yusifin prodüseri və tanınmış teleaparıcı Emin Əfəndi şantajla üzləşib.
Uvertura.az xəbər verir ki,Bakı şəhər sakini, 1978-ci il təvəllüdlü Emin Məmməd oğlu Əfəndi Yasamal RPİ-yə ərizə ilə müraciət edib. O, bildirib ki, yanvarın 19-da naməlum şəxs vatsap vasitəsilə ona mesaj yazaraq Miri Yusifin videolarını yayacağı ilə hədələyib və hesabına 1000 manat ödəməyi tələb edib.
Emin Əfəndi sosial şəbəkə səhifəsində hadisə ilə bağlı açıqlama verib. O, faktı təsdiq edib və bildirib: “Doğrudur, yanvarın 19-u mənə qarşı belə xoşagəlməz bir hal baş verdi və dərhal aidiyyəti orqanlara müraciət etdim.”
Polisə müraciətində 1000 manatın hədə-qorxu yolu ilə alındığını bildirən E.Əfəndi, sosial şəbəkədə kiməsə pul vermədiyini vurğulayıb: “Sadəcə məsələnin hüquqi müstəvidə həlli üçün lazımi addımları atmışıq. Son vaxtlar bu cür kibercinayətlər adi hala çevrilib və təəssüf ki, bir çox insan bu vəziyyətlə üzləşə bilər. Bu da ölkəmizdə daha ciddi maarifləndirmə işlərinin aparılmasını tələb edir. Hüquq-mühafizə orqanlarının operativ reaksiyasına görə təşəkkür edirəm və məsələnin tezliklə həllini tapacağına ümid edirəm.”