Xalq Təsərrüfatı Nailiyyətləri Sərgisinin (XTNS) “Azərbaycan” pavilyonunda Hacı Zeynalabdin Tağıyevə həsr olunmuş sərgi açılıb.
Uvertura.az xəbər verir ki, Xalq Təsərrüfatı Nailiyyətləri Sərgisinin (XTSN) “Azərbaycan” pavilyonunda neft və qaz sənayesi işçilərinin peşə bayramı ilə əlaqədar olaraq, Azərbaycan Respublikası Dövlət Neft Şirkətinin törəmə müəssisəsi olan “SOCAR RUS” şirkəti və Geologiya, Neft və Qaz Muzeyi tərəfindən birgə təşkil olunan “Hacı Zeynalabdin Tağıyev – sənayeçi və mesenat. Şəxsiyyətin Rusiya və Azərbaycan tarixindəki rolu” adlı sərginin açılışı olub.
Sərgini açıq elan edən pavilyonun direktoru Səadət Qədirova qeyd edib ki, xeyriyyəçi və neftçi Hacı Zeynalabdin Tağıyevin şəxsiyyəti ən böyük diqqətə layiqdir.
“Hacı Zeynalabdin Tağıyev öz sərvətini böyük humanitar layihələrə xərcləyirdi. Bu layihələr həm Azərbaycana, həm də Rusiyaya həsr olunmuşdu. O, azərbaycanlı qızların təhsil almasına və Azərbaycanda gimnaziya açmasına xüsusi diqqət yetirirdi. Sentyabr ayında biz həm Azərbaycanda, həm də Rusiyada Neftçilər gününü qeyd edirik və qərara gəldik ki, “Azərbaycan” pavilyonunda bu gözəl insana həsr olunmuş fotosərgi təşkil edək, onun həyat yolu haqqında tədbir iştirakçılarına məlumat verək”, – deyə S.Qədirova bildirib.
Sərgidə Hacı Zeynalabdin Tağıyevin həyat yolunu və fəaliyyətini əks etdirən fotoşəkillər nümayiş olunur. Sərginin qonaqları, habelə bu görkəmli sənayeçi və xeyriyyəçinin tərcümeyi-halı, Azərbaycanın neft sənayesinin tarixi ilə daha yaxından tanış olmaq imkanı əldə edəcəklər.
