Baku TV-nin “Qapqara” verilişinin yeni buraxılışı yayımlanıb.
Uvertura.az Ölkə.az-a istinadən xəbər verir ki, bu dəfəki verilişin qonağı müğənni Üzeyir Mehdizadə olub.
Bir çox ölkələrdə mahnıları məşhurlaşan və dünya səhnələrində konsertlər verən müğənni, öz məqsədlərindən danışıb:
“20 ildir ki, bu sahədə peşəkar fəaliyyət göstərirəm. Hal-hazırda olduğum yerdən məmnunam. Məqsədim budur ki, necə ki xaricdən bizə müğənnilər gəlir və insanlar xarici musiqiləri dinləyir, bizdən də bunu edənlər olsun. İlk növbədə isə bunu özüm etməyə çalışacağam.”
İnsanlara pozitivlik aşılamanın vacibliyini vurğulayan Üzeyir Mehdizadə bildirib ki, hazırda oxuduğu mahnılara daha diqqətli yanaşır:
“Gənc yaşlarımda elə mahnılarım olub ki, bu gün onları məndən istəsələr də, oxumaram. Əyləncəli mahnılar dünyada ən çox tələb olunanlar arasındadır. Mənim də belə mahnılarım olub. Ancaq bu gün xarakterimə uyğun olaraq düşünürəm ki, əvvəllər o mahnılardan üç dənə varsa, indi bir olsaydı, daha yaxşı olardı. İnsanlara pozitivlik aşılamalıyıq, amma bu da ölçülü olmalıdır. İndi mahnılarımın sözlərinə diqqət edirəm, çox ehtiyatlı davranıram, gərək əvvəllər də belə edərdim.”
Keçmişinin ona böyük stimul verdiyini deyən müğənni, səhvlərdən heç kimə sığorta olmadığını qeyd edib:
“Keçmiş haqqında çox düşünən bir insanam. Ötüb keçən günlərimə sadəcə olaraq yanaşmıram, onlar mənə çox şey öyrədir. Əgər əvvəl yaşadıqlarımı yaşamasaydım, bu gün başqa düşüncələrim olardı.”
