Avqustun 13-də Akademik Milli Dram Teatrının və Azərbaycan Teatr Xadimləri İttifaqının kollektivi, eləcə də ailə üzvləri doğum günü münasibətilə II Fəxri xiyabanda Xalq artisti, görkəmli rejissor Azər Paşa Nemətovun məzarını ziyarət ediblər.
Uvertura.az xəbər verir ki, Teatr Xadimləri İttifaqının sədr əvəzi Hacı İsmayılov və Akademik Milli Dram Teatrının Bədii rəhbəri Mehriban Ələkbərzadə Azər Paşa Nemətovun həyat və yaradıcılığı haqqında fikirlərini bölüşüb, onun keçdiyi sənət yoluna nəzər salıblar.
Azər Paşa Nemətov 2023-cü il, aprelin 9-da 76 yaşında vəfat edib.
O, uzun illər Azərbaycan Teatr Xadimləri İttifaqına və Akademik Milli Dram Teatrına rəhbərlik edib. Fəaliyyəti dövlət tərəfindən yüksək qiymətləndirilib.
Teatr sənəti sahəsində xidmətlərinə görə 1987-ci ildə Əməkdar incəsənət xadimi, 2002-ci ildə Xalq artisti fəxri adlarına, 2007-ci ildə “Şöhrət”, 2022-ci ildə “Şərəf” ordenlərinə layiq görülüb.
Allah rəhmət eləsin!
