“Aprelin 23-ü, yəni bu gün məşhur və sevilən sənətkarımız, Xalq artisti Məleykə Əsədova doğum gününü qeyd edir. Teatrımızın kollektivi adından əziz Məleykə xanımı ürəkdən təbrik edir, ona cansağlığı, uzun və sağlam ömür arzu edirik”.
Uvertüra.az xəbər verir ki, bu haqda Akademik Milli Dram Teatrının rəsmi “Facebook” səhifəsi üzərindən məlumat verilib.
“Səhnədən, teatrdan, tamaşaçı sevgisindən uzaq düşməsin. Alqış və gül çiçək içində olsun. Təbriklər!”, – deyə qeyd edilib.
Əlavə etmək yerinə düşər ki, aktrisa 1966-cı il aprel ayının 23-də Neftçala rayonunda anadan olub. 1983-cü ildə Mirzağa Əliyev adına Azərbaycan Dövlət İncəsənət İnstitutuna daxil olub. Məleykə Əsədova 1989-cu ildə Dövlət Gənclər Teatrının truppasına daxil olub. Bu kollektivdə çalışan aktrisa teatrın beş tamaşasında rol oynayıb. 1993-cü ildə isə Akademik Milli Dram Teatrının truppasına daxil olub. Onun səhnə rolları bioqrafiyasına Akademik teatrda ifa etdiyi müxtəlif obrazlar daxildir.
Azərbaycan Dövlət Televiziyasında hazırlanmış teletamaşalarda çoxsaylı obrazlar (Jalə, Əfsanə, Cavidan, Sara, Xurşidbanu Natəvan və s.) yaratmışdır.
1998-ci ildə Azərbaycan Respublikasının Əməkdar artisti, 2000-ci ildə isə Xalq artisti fəxri adı ilə təltif olunub. Prezident mükafatçısıdır. 2014-cü ildə Cəfər Cabbarlı adına Mükafata layiq görülüb. 2019-cu ildə “Azərbaycan Respublikası Prezidentinin fəxri diplomu” ilə təltif edilib.
