Xalq artisti Tünzalə Ağayeva ard-arda yeni layihələr təqdim etməyə davam edib.
Uvertura.az Big.az-a istinadən xəbər verir ki, məşhur pop ulduzu bu dəfə “Atəşim var, külüm yox” mahnısına yeni bir nəfəs gətirib. Sevilən müğənni, əfsanəvi əsəri tam fərqli janrda və aranjemanda təqdim edib. Mahnının aranjemanı Emin Karim tərəfindən hazırlanıb.
Mahnının musiqisi və sözləri bəstəkar, sənətçi Suat Sayına məxsusdur. Rep hissəsini isə meyxanaçı və şair Fariz Zeynalov yazıb.
Tünzalə Ağayeva yeni layihəsindən belə danışıb: “Mahnıda səslənən rep hissəsi əsərə bir yenilik qatdı. Xahişimlə dəyərli dostum, meyxanaçı və şair Fariz Zeynalov möhtəşəm bir qəzəl yazdı. Çox istəyirdim ki, bu mahnı məhz xip-xop janrında səslənsin. Burada da rep tələb olunduğu üçün düşündük ki, belə maraqlı alınar. Klipdəki obrazım eşqə düşən, eşq axtaran müasir dərviş obrazıdır. Rəqqaslarımız iki sevgili obrazını canlandırdılar. Onlar çox istedadlıdırlar. Bu mahnıya müraciət etməyimdə əsas məqsəd, gənc nəsillərə bizim xalq mahnılarımızı, bəstəkarlarımızı, muğamlarımızı, təsniflərimizi və folklorumuzu tanıtmaqdır.”
Qeyd edək ki, klip Tünzalə Ağayevanın şəxsi YouTube kanalı və bütün musiqi platformalarında yayımlanıb.
