Rəşid Behbudov adına Dövlət Mahnı Teatrında görkəmli bəstəkar, Xalq artisti Tofiq Quliyevin məşhur mahnılarından ibarət konsert proqramı təqdim edilib.
Uvertura.az Azərtac-a istinadən xəbər verir ki,konsertdə bəstəkarın ən çox sevilən mahnıları teatrın instrumental ansamblının müşayiəti ilə solistlərin ifasında səsləndirilib. Ansamblın bədii rəhbəri Mirxalid Salayevdir.
Teatrın solistləri Tofiq Quliyevin əbədiyaşar mahnılarını ifa edərək, konsertə qatılanlara nostalji və xoş anlar yaşadıblar. Hər bir ifa, Tofiq Quliyevin musiqisinin möhtəşəmliyini bir daha ortaya qoyub.
Tofiq Quliyev, Azərbaycan musiqi mədəniyyətində estrada və caz musiqisinin əsasını qoyaraq, bu sahədə yeni bir səhifə açmış böyük sənətkardır. O, Üzeyir Hacıbəyli tərəfindən qoyulmuş Azərbaycan professional musiqi ənənələrinin davamçısı olmaqla yanaşı, estrada və caz musiqisinin, həmçinin ilk Azərbaycan Dövlət Caz Orkestrinin yaradıcısıdır. Beş musiqili komediya, valslar, fortepiano üçün prelüdlər və variasiyalar, həmçinin çox sayda kino musiqisinin müəllifi olan Tofiq Quliyev, estrada musiqisinin böyük ustadı kimi tanınır. Onun lirik, şux, nikbin və oynaq çalarlı mahnıları zamanın sınağından keçib və əbədiyaşar qalacaq. Bugün, böyük bəstəkar artıq aramızda olmasa da, onun mahnıları hələ də müxtəlif tədbirlərdə və konsertlərdə səslənir. Tofiq Quliyevin mahnıları, gələcək nəsillər tərəfindən də sevgi və maraqla dinləniləcək.
