Avropa İttifaqının (Aİ) Azərbaycandakı nümayəndəliyi, Aİ-yə üzv ölkələrin səfirlikləri ilə birgə beşinci dəfə təşkil olunan “FantazEU” Mədəni İrs Festivalı çərçivəsində ilk Avropa milli geyimləri sərgisini təqdim edib.
Uvertura.az Azərtac-a istinadən xəbər verir ki, sərginin əsas məqsədi Azərbaycan izləyicilərini Avropa ənənəvi geyimlərinin tarixi ilə tanış etməkdir.
Sərgi zamanı, Bolqarıstan, Çexiya, Almaniya, Latviya, Litva, Polşa, Rumıniya və Slovakiya səfirlikləri, müxtəlif dövrlərə aid milli geyimləri təqdim edərək, Aİ ölkələrinin mədəni müxtəlifliyini və adət-ənənələrini nümayiş etdiriblər.
Aİ-nin Azərbaycandakı səfiri Peter Mixalko tədbirdə çıxış edərək bildirib ki, “Milli geyim, bir xalqın tarixini əks etdirir. Bu, sosial-iqtisadi, mədəni-tarixi və coğrafi amillərin təsiri ilə formalaşır. Buna görə də milli geyimlər, müxtəlif ölkələrin mədəniyyətini öyrənmək üçün mühüm bir mənbə rolunu oynayır. Ümid edirik ki, sərgi Azərbaycan izləyicilərinə Aİ-yə üzv ölkələrin milli mədəniyyəti və folkloru haqqında daha ətraflı məlumat əldə etməyə imkan yaradacaq”.
