Azərbaycan Dövlət Akademik Musiqili Teatrında iki yeni səhnə əsəri – “İnanıram” və “Əliqulu bu gün evlənir” tamaşalarının premyeraları keçirilib.
Uvertura.az Azərtac-a istinadən xəbər verir ki, hər iki tamaşa teatrsevərlər tərəfindən böyük maraqla qarşılanıb.
“Şöhrət” ordenli, Xalq artisti Şüküfə Yusupovanın ifasında təqdim olunan “İnanıram” monotamaşasının müəllifi gənc yazıçı-dramaturq Ülviyyə Heydərova, quruluşçu rejissoru Leonid Klets, quruluşçu rəssamı Vüsal Rəhim, musiqi tərtibatçısı və səs rejissoru Məhəmməd Məmmədov, videoqrafı Murad Həsənov, rejissor assistenti Zaur Əliyevdir. Psixoloji dram janrında qurulan bu tamaşa müharibədə oğlunu itirmiş bir ananın həyatını izah edir və müəllif əsəri müharibə nəticəsində övladını itirmiş analara ithaf edib.
Digər tərəfdən, “Əliqulu bu gün evlənir” komediyası, yazıçı-dramaturq Sabit Rəhmanın “Əliqulu evlənir” pyesi əsasında Xalq artisti İlham Namiq Kamalın librettosu və quruluşu ilə hazırlanıb. Dövrümüzlə uyğunlaşan, dinamik süjet xəttinə malik olan komediyanın bəstəkarı Əməkdar incəsənət xadimi Oqtay Rəcəbov, musiqi mətnlərinin müəllifi isə tanınmış şair Baba Vəziroğludur.
Tamaşada, İlham Namiq Kamalın ifasında təqdim olunan Əliqulu obrazı vasitəsilə “kreslo xəstəliyi”nə tutulmuş vəzifə düşkünləri satira və gülüş hədəfi kimi səhnəyə qoyulur.
Tamaşanın quruluşçu dirijoru Əməkdar incəsənət xadimi Fəxrəddin Atayev, xormeysteri isə Əməkdar artist Vaqif Məstanovdur. Quruluşçu baletmeysteri Əməkdar artist Nigar Şahmuradova, quruluşçu rəssamı Əməkdar rəssam Nabat Səmədova, geyim üzrə rəssamı Nübar Hüseynova, konsertmeysteri isə Fidan Əliyeva olub.
Tamaşada İlham Namiq Kamal ilə yanaşı, Əməkdar artistlər Əkbər Əlizadə (Rövşən), İqrar Salamov (Səfər), Prezident mükafatçısı Səmədzadə Xasiyev (Kamal), aktyorlar Zemfira Əbdülsəmədova (Gövhər), Rəsmiyyə Nurməmmədova (Humay), Gülçöhrə Abdullayeva (Səadət), Əliməmməd Novruzov (Xəlil), Gülnarə Əzizova (Nazlı), Ruslan Mürsəlov (Azad), Böyükxanım Məmmədova (Heyvaxanım), Mehriban Rəcəbova (Lumuxanım), Əzizəxanım Kazımova (Qumral) və digər xor və balet artistləri iştirak ediblər.
