Prezident İlham Əliyev, Azərbaycan ədəbiyyatının dəyərli nümayəndəsi, Xalq şairi Bəxtiyar Vahabzadənin 100 illik yubileyinin qeyd olunması ilə bağlı Sərəncam imzalayıb.
Uvertura.az xəbər verir ki, sərəncamda bildirilir: “2025-ci ilin avqust ayında Azərbaycan ədəbiyyatının tanınmış nümayəndəsi, Xalq şairi, dramaturq, ədəbiyyatşünas, pedaqoq, ictimai xadim, SSRİ və Azərbaycan Respublikasının Dövlət mükafatları laureatı, akademik Bəxtiyar Mahmud oğlu Vahabzadənin doğumunun 100 ili tamam olacaq.
Bəxtiyar Vahabzadə XX əsrin ikinci yarısından etibarən Azərbaycan bədii-ictimai fikrinin parlaq şəxsiyyətlərindən biri olaraq Vətənə, millətə və ana dilinə olan böyük məhəbbətini, dərin poetik və fəlsəfi düşüncələrini öz irsində yaşatmışdır. Onun yaradıcılığı, milli azadlıq ideallarına və istiqlal məfkurəsinə bağlılıq, həmçinin mədəni-mənəvi dəyərlərə ehtiram hissi ilə zəngindir. Sənətkarın pedaqoji fəaliyyəti, bir neçə nəslin milli düşüncəsinin formalaşmasına böyük təsir göstərmişdir. Bəxtiyar Vahabzadə həmçinin ictimai mövqeyində həmişə xalqın taleyinə dair aydın və müdrik fikirlər irəli sürmüşdür.”
Sərəncama əsasən, Mədəniyyət Nazirliyinə Elm və Təhsil Nazirliyi ilə birgə, Azərbaycan Yazıçılar Birliyinin təklifləri əsasında, Bəxtiyar Vahabzadənin 100 illik yubileyinə dair tədbirlər planı hazırlanıb həyata keçirilməlidir. Nazirlər Kabineti isə bu Sərəncamdan irəli gələn məsələləri həll etməlidir.
