Böyük maraqla izlənilən “Muğam” Televiziya Müsabiqəsinin IX yarışmasına start verilir. Heydər Əliyev Fondunun dəstəyi, “Azərbaycan Televiziya və Radio Verilişləri” QSC və Mədəniyyət Nazirliyinin iştirakı ilə həyata keçiriləcək müsabiqənin may ayında tamaşaçılara təqdim olunması planlaşdırılır.
Uvertura.az xəbər verir ki, müsabiqədə iştirak etmək istəyən 8-30 yaş arası yeniyetmə və gənclər sənədlərini Lənkəran, Bərdə, İsmayıllı, Xaçmaz, Şəki, Sabirabad və Gəncə Regional Mədəniyyət idarələrinə, Naxçıvan MR Mədəniyyət Nazirliyinə və Azərbaycan Televiziyasına təqdim edə bilərlər.
İştirakçılar muğam şöbələri üzrə klassik və müasir Azərbaycan şairlərinin qəzəllərini səsləndirəcək, xalq mahnıları, təsniflər və zərb-muğamları ifa edəcəklər. Onlara milli musiqi alətlərindən ibarət instrumental ansambl müşayiət edəcək. Yarışlar Bakıda Beynəlxalq Muğam Mərkəzində və ölkənin müxtəlif bölgələrində təşkil olunacaq. Final konsertinin isə avqust ayında keçirilməsi və qaliblərin mükafatlandırılması nəzərdə tutulur.
İştirak üçün yeniyetmələr 2 fotoşəkil və doğum haqqında şəhadətnamənin surətini, gənclər isə 2 fotoşəkil və şəxsiyyət vəsiqəsinin surətini təqdim etməlidirlər. Sənədlərin qəbulu martın 1-dən aprelin 1-dək davam edəcək. Aprel ayı ərzində respublikanın müxtəlif bölgələrindən seçilən 30 namizəd – 20 gənc və 10 yeniyetmə – münsiflər heyəti tərəfindən müəyyən ediləcək.
.Əlavə məlumat üçün : https://youtu.be/jOnElNxST1c.
