Aprelin 9-da milli kinomuzun İsmayılı – aktyor və rejissor Ceyhun Mirzəyevin növbəti doğum günü keçib. O, 1946-cı ildə Ağdam rayonunun Abdal-Gülablı kəndində anadan olub. Azərbaycan Dövlət İncəsənət İnstitutunun rejissorluq fakültəsini bitirib və Moskvada da təhsil alıb. Onun 46 illik ömrünün 35 ilə yaxını kino ilə bağlı olub. Çünki “Görüş” filmində Şıxəlinin oğlunun obrazını yaradanda cəmi 11 yaşı var idi. 12 yaşı olanda isə “Ögey ana”ya (İsmayıl obrazı ilə) dəvət almışdı.
Ceyhun Mirzəyev kinostudiyada müxtəlif peşələrdə çalışıb, ayrı-ayrı vaxtlarda assistent, rejissor köməkçisi, rejissor və aktyor kimi fəaliyyət göstərib. “Mozalan” satirik kinojurnalı üçün süjetlər çəkib və onun bədii rəhbəri olub. Ceyhun Mirzəyev həm də parodiyaçılıq qabiliyyətinə malik olub. Belə ki, o, bir dəfə söhbət etdiyi adamın səsini, danışıq formasını o dəqiqə yamsılamağı bacarırmış. Hətta “Mozalan”ın başlığında səslənən vızıltı səsi də ona məxsus olub.
Ceyhun Mirzəyevin son filmi “Fəryad” idi, lakin bu filmin premyerasında iştirak edə bilmədən vəfat edib. Yasamal qəbiristanlığında dəfn olunub.
- Fəryad filmindəki şücaətinə görə “Bakılı” cəmiyyətinin “Humay” mükafatına layiq görülüb.
- Ölümündən sonra Diplom və Priz verilmişdir.
- Milis işçisi Cəmil Mirzəyevin oğludur.
Yaşasaydı 77 yaşını qeyd edəcəkdi. Ruhu şad olsun!
