Azərbaycanın mədəniyyəti və multikulturalizm ilə bağlı Cənubi Koreyanın onlayn nəşri olan “Korea Times”da məqalə paylaşılıb. Uvertüra.az-ın məlumatına əsasən məqalənin müəllifi “Dae-kwang International Co.”nun prezidenti və Koreya-İsveç Assosiasiyasının direktoru Choe Chong-dur. O, məqaləsində Azərbaycanın qədim şəhəri olan Qəbələdən, Nizami Gəncəvinin “Xəmsə” poemasına daxil olan “Leyli və Məcnun” əsərindən bəhs edib.
Müəllif, eyni zamanda Nizami Gəncəvinin “Leyli Məcnun” əsərinin Koreya dilinə son tərcüməsi haqqında da danışıb. Onun sözlərinə əsasən Azərbaycan dünyada ənənələri və multikulturalizmi canlı saxlayan ölkələrdən biridir. Choe Chong deyib ki, ölkə keçmişdə dağıdılan dini və mədəni irsləri yenidən bərpa etmək üçün müxtəlif işlər görməkdədir. Müxtəlif etnik qrupların Azərbaycanda yaşamasından danışan müəllif onların sırasında azərbaycanlılar, türklər, ləzgilər, talışlar və digər etnik qrupların adlarını çəkir.
Koreya-İsveç Assosiasiyasının direktoru Choe Chong Ümummilli lider Heydər Əliyevin təsirli bioqrafiyasından da bəhs edib və əlavə edib ki, onun uğurlu siyasəti Azərbaycanı inkişafa aparıb. Bildirib ki, Azərbaycan hökuməti 2023-cü ili “Heydər Əliyev ili” elan edib və onun anadan olmasının 100 illiyi qeyd ediləcək.
