Bakıda keçirilən BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası, ölkəmizin qlobal ətraf mühit məsələlərinə verdiyi önəmin bariz nümunəsidir.
Uvertura.az Azərtac-a istinadən xəbər verir ki, paytaxtımızın ən iri kütləvi tədbir məkanı olan Bakı Stadionunda keçirilən və noyabrın 22-dək davam edəcək sessiya müddətində, Azərbaycan Respublikası Mədəniyyət Nazirliyinin təşkilatçılığı ilə müxtəlif mədəni tədbir və təqdimatlar baş tutmaqdadır.
Tədbirin gerçəkləşdiyi məkanlarda əsrlərlə yaşı olan unikal xalça və digər toxuculuq nümunələrimiz, təsviri və dekorativ sənət örnəkləri, milli geyimlər və sənətkarlıq məmulatları nümayiş olunur.
Azərbaycan təsviri sənətinin tanınmış nümayəndələri tərəfindən yaradılan və ölkəmizin möhtəşəm təbiətini, zəngin florasını və faunasını əks etdirən əl işləri xüsusi maraqla qarşılanır.
