Rusiya paytaxtında tanınmış bəstəkar, müğənni və diplomat Polad Bülbüloğlunun yubiley konserti keçirilib. Klassik musiqi və Azərbaycan musiqi sənətinin sevərləri, Dmitri Yarovski və Murtuza Bülbülün rəhbərliyi altında Y.Svetlanov adına Rusiya Dövlət Akademik Simfonik Orkestrinin ifasında əsərləri dinləyiblər.
Uvertura.az Azərtac-a istinadən xəbər verir ki, konsertdə maestronun orijinal əsərləri, Azərbaycan xalq mahnılarının aranjesi, həmçinin simfonik rəqslərin dünya premyerası və skripka və orkestr üçün konsertin Moskva nümayişi təqdim olunub. Gecənin əlamətdar anlarından biri Polad Bülbüloğlunun konsertini təqdim edən məşhur skripkaçı Vadim Repinin çıxışı olub. Vokal hissələri isə Azərbaycanın Xalq artisti Samir Cəfərov tərəfindən ifa edilib.
Konsertə qatılan musiqisevərlər orkestr üçün yazılmış rapsodiya, konsert valsı, “Eşq və ölüm” baletindən fraqmentlər, eləcə də “Nolaydı”, “Xumar oldum”, “Bəri bax”, “Qara tellər” kimi mahnıların aranjesiyalarını dinləyiblər. Bu konsert Moskvanın mədəni həyatında Azərbaycan musiqi və simfonik sənət ənənələrini bir araya gətirən parlaq bir hadisəyə çevrilib.
