Baku TV ötən il dekabrın 25-də Bakı-Qroznı reysi zamanı Qazaxıstanın Aktau şəhəri yaxınlığında qəzaya uğrayan AZAL-a məxsus sərnişin təyyarəsi haqqında sənədli film hazırlayıb.
Uvertura.az Report-a istinadən xəbər verir ki, J2-8243: Son uçuş” adlı sənədli film dörd hissədən ibarətdir.
Filmdə qəza nəticəsində həyatını itirənlərin, sağ qalanların və onlara yardım edənlərin hekayələri yer alıb.
Filmin “Biri var idi, biri yox” adlı ilk hissəsində qəza zamanı yüksək peşəkarlıq nümayiş etdirərək qəhrəmancasına həlak olan baş pilot İqor Kşnyakin, köməkçi pilot Aleksandr Kalyaninov və bələdçi Hökumə Əliyevanın ailə üzvləri xatirələrini bölüşüblər.
Ekipaj üzvlərinin ailəsi Milli qəhrəmanların peşəkarlığı və işlərinə olan sevgiləri barədə fikirlərini ifadə ediblər.
“Hər şey yaxşı olacaq” adlanan növbəti hissədə isə ekipaj üzvlərinin peşəkarlığı sayəsində sağ qalan sərnişinlərdən bəziləri və ekipaj üzvü Zülfüqar Əsədov danışıb.
Sənədli filmin üçüncü hissəsi olan “Aktau”da isə qəza baş verən kimi hadisə yerinə gələn Qazaxıstanın yardım qrupları, jurnalistlər və qəza şahidləri təəssüratlarını bölüşüblər.
“Necə oldu?” adlı dördüncü hissədə qəzanın baş verməsindən sonra yaşananlar, Prezident İlham Əliyevin Rusiya səfərini yarımçıq saxlayaraq ölkəyə qayıtması və müşavirə keçirməsi kimi məqamlar barədə məlumat verilib. Bu hissədə ekspertlər, politoloqlar və AZAL əməkdaşları da qəza barədə fikirlərini ifadə ediblər.
Filmdə həmçinin qəza sonrası həlak olan və sağ qalan ekipaj üzvlərinin Prezident İlham Əliyevin sərəncamı ilə təltif olunması, sağ qalan sərnişinlərə peşəkar tibbi xidmətin göstərilməsi və dövlət qayğısı xüsusi vurğulanıb.
Filmin sonunda qəzanın dəqiq səbəbləri ilə bağlı araşdırmanın davam etdiyi və rəsmi açıqlamanın hələ verilmədiyi qeyd olunub.
