Bir neçə gün öncə Azərbaycan Respublikasının Xalq şairi, Milli Məclisin deputatı Sabir Rüstəmxanlı səhhətində yaranan problemlə bağlı özünün “Facebook” səhifəsində post paylaşıb.
Uvertura.az xəbər verir ki, Xalq şairi, yazır:
“Xəstəlik gözlənilmədən qapımı döydü. Dəyərli dostum, böyük tarixçi alimimiz Firudin Ağasıoğlunun peşəkarlığına, təcrübəsinə güvəndiyim oğlu, Baku Medical Plaza-nın məşhur cərrahı Tengizlə görüşdüm. O, əməliyyatın qaçılmaz olduğunu dedi və bir həftədə ayağımda 2 ağır əməliyyat apardı (biri daxili qanaxmadan). İndi yavaş- yavaş gəzirəm.
Mənə əmi deyən əziz Tengizə, reanimasiya şöbəsinin müdiri Elxan Bəşirova, anistozoloq Oqtay Şamilova, radiologiya sahəsinin yüksək səviyyəli mütəxəssisi Fidan xanım Şükürovaya, ümumu cərrahiyyə şöbəsindən Niyazi Qənbərliyə, poliklinikadan Hidayət Məmmədzadəyə ən gərgin anlarımda başımın üstündə olduqlarına görə təşəkkür edirəm.
Onların sayəsində həyatın daha bir sınağından keçdim. Bir də klinikada arı kimi çalışan qoruyucu mələklərə, tibb bacılarına—Güllərə, Ayselə, Kəmaləyə, Laləyə və adlarını xatırlamadığım texniki işçilərə dərin minnətdarlığımı bildirirəm… Yaxşı ki çətinə düşəndə ürəklə üz tuta biləcəyimiz belə tibb müəssisələrimiz və güvənə biləcəyimiz gözəl mütəxəssislərimiz var! Hamısına can sağlığı arzulayıram!”.
