Fevralın 13-dən 23-dək 75-ci Berlinale (Berlin Beynəlxalq Film Festivalı) keçirilir.
Uvertura.az xəbər verir ki, Azərbaycan Respublikasının Kino Agentliyi (ARKA) milli kinomuzu beynəlxalq arenada tanıtmaq və ölkəmizin mədəni irsini təqdim etmək məqsədilə festivalda öz pavilyonu ilə təmsil olunur.
Mədəniyyət Nazirliyinin Beynəlxalq əlaqələr şöbəsinin müdiri Fərrux Cumayev, ARKA-nın baş direktoru vəzifəsini icra edən Orxan Fikrətoğlu, agentliyin əməkdaşı Səbinə Bağırova, Berlindəki Azərbaycan Mədəniyyət Mərkəzinin nümayəndələri və bir sıra azərbaycanlı rejissor və prodüserlər festivalda və Avropa Film Bazarında (European Film Market – EFM) iştirak edirlər.
Azərbaycan nümayəndə heyəti, milli kinematoqrafiyamızın dünya miqyasında daha geniş tanıdılması və bu sahədə yeni əməkdaşlıq əlaqələrinin qurulması məqsədilə görüşlər keçirir və müzakirələr aparır.
Dünyanın aparıcı kino mərkəzləri və istehsalçıları öz filmlərini və layihələrini EFM-də təqdim edirlər.
Qeyd edək ki, festival rejissor Tom Tikverin “İşıq” (The Light) filminin nümayişi ilə başlanıb. Berlinaledə 19 film “Qızıl ayı” mükafatı uğrunda yarışır.
