Ankarada Əhməd Cavad adına İnstitut, Azərbaycanın Türkiyədəki səfirliyi və TÜRKSOY tərəfindən Azərbaycanın Zəfər Günü şərəfinə təşkil olunan tədbirlər çərçivəsində tanınmış dizayner, Azərbaycan Milli Geyim Mərkəzinin rəhbəri sənətşünaslıq üzrə fəlsəfə doktoru Gülnarə Xəlilovanın sərgisi açılıb.
Uvertura.az Azərtac-a istinadən xəbər verir ki, ekspozisiyada Qarabağ bölgəsinin milli geyim ənənələrinin əks olunduğu “Qarabağ və Xarıbülbül” kolleksiyası nümayiş olunub. Həmçinin unikal “Qarabağın cizgiləri” layihəsi – qədim Azərbaycan torpağının zəngin irsini və ictimai həyatını, musiqi və ədəbiyyatını əks etdirən ipək üzərində yaradılmış Qarabağın görkəmli şəxsiyyətlərinin portretləri təqdim edilib.
Türk dünyasının mədəniyyəti və incəsənətinə verdiyi töhfələrə görə Gülnarə Xəlilova, Azərbaycan ədəbiyyatının böyük nümayəndəsi, şair, maarifçi və ictimai xadim Əhməd Cavadın 130 illik yubileyi münasibətilə təsis olunan “Əhməd Cavad” medalı ilə təltif edilib.
Qeyd edək ki, “Cizgi” brendinin yaradıcısı Gülnarə Xəlilovanın kolleksiyaları ABŞ, Böyük Britaniya, İsveç, Avstriya, Rumıniya, Türkiyə, Rusiya, Çin, Qazaxıstan, Qırğızıstan, Özbəkistan, Bolqarıstan, Norveç, Serbiya, Şimali Kipr Türk Respublikası və bir çox digər ölkələrdə keçirilən moda həftələri və beynəlxalq tədbirlərdə böyük uğurla nümayiş etdirilib.
