Azərbaycan Milli İncəsənət Muzeyində Xalq rəssamı və müasir təsviri sənətin tanınmış nümayəndələrindən olan Sirus Mirzəzadənin “Xəyalların qanadlarında” adlı fərdi sərgisi açılıb.
Uvertura.az Azərtac-a istinadən xəbər verir ki, Mədəniyyət Nazirliyi və Milli İncəsənət Muzeyinin təşkilatçılığı ilə keçirilən sərgidə rəssamın 100-ə yaxın rəngkarlıq və qrafika əsəri, həmçinin onun yaratdığı monumental rəngkarlıq nümunələrinin fotoşəkilləri nümayiş etdirilib.
Sirus Mirzəzadə həm monumental, həm də dəzgah rəngkarlığı ilə yanaşı, qrafika sahəsində də özünəməxsus bədii irs yaratmış və milli rəssamlıq məktəbinə dəyərli töhfələr vermiş sənətkarlardan biridir. Ə.Əzimzadə adına Azərbaycan Dövlət Rəssamlıq Məktəbi və Moskva Ali Rəssamlıq-Sənaye Məktəbinin məzunu olan rəssam 1970-ci illərdən etibarən öz fərdi yaradıcılıq yolunu müəyyən etmişdir. Onun əsərləri, ənənə ilə müasirliyi birləşdirərək, özünəməxsus üsluba sahib olmaqla, rəssamın poetik düşüncə tərzini, dünyaya fəlsəfi baxışını və gözəlliyə olan dərin həvəsini əks etdirir.
Xalq rəssamının bədii fəaliyyətinin əsas istiqamətini təşkil edən monumental boyakarlıq sahəsi isə Bakı və digər şəhər və rayonlarda yerləşən binalarda bəzədiyi freska, mozaika və vitrajların fotoşəkillərini özündə cəmləşdirir. Bu əsərlər sərginin mühüm bir hissəsini təşkil edir və rəssamın geniş və çoxşaxəli yaradıcılığı haqqında dolğun təsəvvür yaradır.
Sərgi martın 1-dək ziyarətçilər üçün açıq olacaq.
