Azərbaycanın Əməkdar İncəsənət xadimi Süleyman Rüstəm 1906-cı il mart ayının 12-də Novxanı kəndində anadan olub. Süleyman Rüstəm, kasıb həyat tərzi, çətin uşaqlıq illəri keçirməsinə baxmayaraq, ədəbiyyata, poeziyaya böyük maraq göstərib, yaradıcılığında da fəhlə, kəndli əməyinə, torpağa və zəhmətə qiymət verməyi işıqlandırıb.
Uvertura.az xəbər verir ki, bu gün Xalq şairi Süleyman Rüstəmin anadan olmasının 119 ili tamam olur.
O, “Gənc işçi” qəzeti redaksiyasında çalışıb. Onun “Unudulmuş gənc” adlı ilk şeiri “Maarif və ədəbiyyat” jurnalında çap edilib. Süleyman Rüstəm ədəbiyyatımızda tərənnüm, vəsf və ithaf şeirlərinin ən məhsuldar yaradıcılarından biri idi. O, “Təbrizim”, “Könlümə Təbriz düşdü”, “İşıq”, “Yenə Araz qırağında”, “Yaralarım”, “Görsəm” kimi şeirlərin, “Ana ürəyi”, “Durnalar”, “Ana və poçtalyon”, “Gün o gün olsun ki” kimi kitabların müəllifidir. Ədəbi fəaliyyətə “Çimnaz xanım yuxudadır” birpərdəli komediyası ilə başlayan sənətkarın “Qaçaq Nəbi” mənzum dramı, “Durna” komediyası dramaturgiyamızın incilərindəndir.
Süleyman Rüstəm 1989-cu ildə vəfat edib.
